تحاجيت ن دادا بوخزينة -ذة: مريم مركوم-أكاديمية التراث

تحاجيت ن دادا بوخزينة

توريت تاسلماذت : مريم مركوم

  أوشثييد إيمجان انون ربي أكن إعاون إ مالا ور تعاوذم ثحاجييت أونيت إثاروا انون التقليد أخ ييري انون. حاجيتكم لوكان ما هما ما جيتكم. أخ ييشت انتربات أقارناص "صابرة" إهجريت يباس يدجيت وحذس تترو تخمم مسكينة يماس ثموت اولا انتاث ثمغر وحذس اتايوجيلت. ثكال اتيرار أكذ ثموشوت أنس " نسيمة " باش أتتو الدجنون اتفقاع انس.

أتوغ تصخر إثموشوت انس قاع ماين ثخس أتوغ اتنهلا ذيس يرو اتگاس حال ميسم اتگن إ يوذان تبطا يكذس ماتشا اتسسيت أولا ييضس أتوغ تسوضوسيت أكذس باش أولا ذيدجن ألاست يكُر نغ آت إآذا. ماشا أتوغ إدج أوامزيو إزدغ ذ گيفري نييذبيرن. أغنبو أنس يقبح يساگاذ. ثميدجا انس ثسرعاب عباد الله أتوغ مي غا يلاز إهكا غر لغاشي أودوار يساگاذيثن يتاكراسن أيسوم ذي مندي الحاصول قاع ماين يوفا ذي ثخزينت. ها سمانت " دادا بوخزينة "

" صابرة " أتوغت ثزدغ ثوذس أيفري ايذبيرن ثموشوت أنس اتوغات اتفغ بلا لخبار انس اتاكر إوامزيو ما ين إزايذن أخس أتتيث وحذس.

إيدج أومور آكذ إيدج أومنسي صابرة مسكينة ثوفا بلي ثموشوت أنس ثسكذوب أخس اتخدعتث . ثقيم صابرة أتت ذگيشت نتفاحت توغات ثكست زگورثو اوامزيو ، ثقيم اثموشوت ثاخداعت اتنحكا ياكيذس ثسموعييو باش أكيذس تبضا ثتفاحت ماشا صابرة ثقل أغرس ثناس : اوركيذم بطيغ أولا ذيشت نلحاجت أثموشوت ثاخداعت . ذانيتا ثموشوت اثفكر باش أتنتاقم زي صابرة ثنگز خ طابلة ثسحوف أغراف اومان اخ ثفقونت ثسخسياس العافيت إ صابرة.

ذي الوقت اني أتوغ أولاح زالاميط غر الغاشي باش آذ شعلن العافيت أتوغ اتشاثن ثناين نتزروين أكذ بعضياتسن باش أذشعلن العافيت اتربان ذي ثفقونت اتدجانت أمني ثشعل بلا ما تسخسين. ماشا صابرة مسكينة توغت اورثسين ميسم غا ثگ، ثكر تروح غر وامزيو باش أترزو خالعافيت.

ثيوض صابرة غر ييفري ايذبيرن ثوفا أمزيو ذا مقران يرو القد أغرابو يامقران توغث إشكا إدج اوغيول يگا خوزليف أنس أذان اوغيول حال التاج يرض ثيسريت أوغيول يگا ذي ضارن أنس إفقراش أوغيول ، يفرح يضحك يقار : نتش ذا جليذ البحر نتمورث.

أمي يزرا صابرة يسقسات ماين توسا أغرس ثگ ، ثناس صابرة : أخسغ شوايت نلعافيت . أمزيو إعجباس أوال ان صابرة أثعجباس القدث أنس ثاصبحانت ها يوشاس إيدج اوشعال نالعافيت . ثروح صابرة اترگح يذفرتث بلا ما غا ثسن باش آذ إزر ماني اثزدغ. يقيم أمزيو يتروح أغرس الصباح ذو عشي يقاراس : أرشل أزي آ ثربات نتش قا ذا جليذ البحر نتمورث ، مي ثوسيد غري ذي لقصر إنو ما ين توفيذ دادا بوخزينة يتگ؟ ثناس صابرة نتاثا اترجيجي زي الخوف : أوفيغش تشكيذ آ حولي

يناس : ماين ثزريضيي ييرضغ ؟ ثناس : ازريغش ثيرضض أروض إجلذن يناس : ما ين أتوغ إيرضغ ذگضارن ؟ ثناس : أتوغ ثيرضض أهركوس الوزير يناس : ما ين أتوغ أگيغ خو زليف إنو ؟ ثناس : أتوغ ثگيذ الرزث نالحكماء أمزيو إضحك يتروح يترگح يفرح. بصح يتعاقبد أغرس عاوذ يتسقسات ثانيا ، نتاثا مسكينة اتجاواب زي الخوف . يدجول آمزيو باش أزيس يرشل زي الخاطر نغ زي بسيف 

يوسد أغرس يسغوي زي دجهذ أنس زاث إوخام ن صابرة يناس : اسحسد أغري مزيان غرم ثلاثة نليالي باش أتفكرذ ، إلقني آغرم داسغ باش آشم آويغ ثخسذ نيغ لا ما مش ما ينزي ما

ما مش ما ما ينزي ما

مسكينة صابرة ثقيم ثترو الليلت ذاس ألمي يوزغن ثيطاوين أنس زك مطاون ، إيشت نليلت ثزرا يماس الله يرحمها ذي ثارجيت ثناس آخام إيشت نتحيلت أورتسينن لا ذ دجنون ولا ذا مزيون صابرة ثكر زي الخف ثيسي الفاس ايباس ثقيم ثقاز ذي ثمورت إيشت انتفقونت ثغرق اتامقرانت ثگا ذيس إريج حا ما مك لاس ثن يماس ذي ثارجيت .

أمي ديوسا آمزيو ذگاس وو ستلاثا إلاغاياس زي دجهذ باش ألاس اتسل يناس : آ ثمطوط إنو. ثناس صابرة : نتش أور رتشلغ زگامزيون إعفانن إرصضن.

يسغوي أخس آمزيو يناس : ميسم لام ثمسار آلغا لي ثنيذ نتش أجليذ أييفري آ يعفان إرصضن ؟

إنايي ماين توفيد أجليد دادا بوخزينة يتگ مي غري ثوسيد ماين توغ شكيغ ؟ ماين توغ إيرضغ ؟

ثناس صابرة نتاث اضحك : أتوغش اتشكيذ أغيول آيا غيول توغش تيرضض ثيسريت أوغيول آيا غيول توغش تيرضض ذي ضارن انك إفقراش أوغيول ثگيذ آذان أوغيول خو زليف انك آيا رصوض آيا عفان.

أمي يسلا أمزيو أوال ان صابرة يخس آذ يدوقص يقيم يتازل أغرس باش آتيتش ما شا قبل أتياوض إحوف ذي ثفقونت لاس ثغزا يقييم يسغويو يتحاوال باش آذ يفغ زي العافيت.

صابرة ثوالا ذي لاگاج ثناين اميدن أتاسند ألجيهت أنس ، مي ايوضن أغرس ثعقل يباس تروح اتازل ادرعاس ثفرح بزاف يباس يعقبد أغرس يويد أكيذس إيدج اوربا ذا صبحان اثخبراصن أخ وامزيو ها روحن معاوانن أخس آلمي ثنغين

أربا اني مي يسلا ثقصت ( ثقسيست) ن صابرة أثعجباس بزاف إعجباس لعقل أنس ها ينا إيباس ألاست يوش ذو مزوار صابرة ور ثخس ماشا يباس يحكاياس ميسم يگا آربا اني ألمي ثيسلك زي البعض إيوذان إغدارن أتوغ اخسن آثنغن ها ثقبل صابرة ثرشل زيس روحن زذغن ذ گيفري اومزيو أتوغ أرياز أنس ذا نجار ها سمان إيفري اني إيفري أو نجار ها عيشن ذيس فرحن الحياة انسن ثكمل.

إيوا يا سيادي أكيغ أسني الواد الواد إويغد لخيار ذو فقوس شك اويغاك أكيذي إدجن أو هركوس قاث ذي تبورجت اك أسني ثيسيت..